ILOILO CITY – Isa ka solterito ang kumpirmado nga biktima sang ‘Momo Challenge’ sa Syudad sang Iloilo.
Ang biktima amo si alyas John,15 anyos, Grade 9 student kag residente sang Arevalo, Iloilo City.
Sa exlusive interview sang Bombo Radyo Iloilo kay Manang Inday, iloy sang biktima, iya ginpahayag nga nadula ang iya anak kag sang ginpamangkot niya ang mga classmates sini, ila ginpahayag nga wala nagsulod sa eskwelahan ang biktima.
Suno sa iloy, sang nagpauli na ang iya bata, ginrason niya nga ginkidnap siya kag gindala sa isa ka banwa sa Probinsya sang Iloilo.
Diri kag nagdangop sa Arevalo Police Station ang iloy agud ipa-blotter ang insidente.
Sang ginpamangkot ang biktima, nagpamalibad ini nga idetalye ang natabo sa rason nga may mapatay sa iya.
Ginpadulungan naman sang kapulisan ang Consolacion, San Miguel nga suno sa biktima amo ang lugar kun sa diin sila gindala.
Apang sang ulihi, nag-ako ang solterito nga nagdownload siya sang online application nga ‘Momo Challenge’ kun sa diin ginsugo siya sang iya kaistorya diri nga magpadulong sa isa ka malayo nga banwa kag kun magpauli, magapakuno-kuno ini nga daw malipong.
Suno pa kay Manang Inday, gin-ako sang iya anak nga ginhimo-himo lang niya ang pagkidnap sa iya bangud kun indi niya ini paghimuon, ginhambalan siya nga mas maayo pa nga mag-suicide nalang ini.
Ini ang ginapahayag nagtulod sa biktima nga himuon ang challenge bangud sa kahadlok nga indi lang siya ang patyon, kundi ang bilog niya nga pamilya.
