ILOILO CITY–Nagdoble ang numero sang nagluntad nga sunog sa syduad sang Iloilo sang nagligad nga bulan sang Marso nga Fire Prevention Month.
Sa interview sang Bombo Radyo kay SFO3 Aquilino Sampiano, Operations Chief sang Bureau of Fire Protection (BFP) sa syudad sang Iloilo, iya ginpahayag nga naglab-ot sa 77 ang narecord nga sunog sang Marso subong nga tuig kag mas mataas ipanggid sa 34 nga narecord sang nagligad nga tuig.
Kun pahat-pahaton suno kay Sampiano, naglab-ot sa 22 ang structural fire, 24 ang grass fire, 8 ka rubbish fire, 21 ka electrical fire kag 2 ang vehicular fire.
Naglab-ot naman sa P2.8 million pesos ang balor sang kahalitan nga ginbilin sang sunog.
Samtang, todo naman ang kampanya sang BFP sa mga pumuluyo tuhoy sa mga pamaagi agud nga malikawan ang sunog.
Suno kay SFO3 Sampiano, wala gid nagakulang ang BFP sa pagpahanumdum sa mga pumuluyo sa diin ila ginapadulungan ang tagsa ka barangay agud nga magpatigayon sang ‘assessment’.
Ugaling suno kay Sampiano, wala ginahangop sang mga pumuluyo ang ginatudlo sa ila rason nga masami nagaluntad ang sunog.
