Ginpanginwala ni Iloilo City Mayor Jose Espinosa III nga siya ang nagpadelete ukon nagpapanas sang pangalan ni Iloilo Lone District Congressman Jerry Treñas sa graduation sang Technical Institute of Iloilo City (TIIC) .
Sa interview sang Bombo Radyo kay Mayor Espinosa, iya ginpahayag nga pamulitika ang impormasyon nga siya ang nagpakakas sang pangalan ni Treñas agud nga maguba ang iya imahe.Suno kay Espinosa, binutig ang ginapahayag pagpadelete, bangud wala sang imbitasyon nagikan sa TIIC para sa congressman. Mismo siya suno sa alkalde ang wala man sang imbitasyon nagikan sa nasambit nga buluthuan.
Samtang naghatag naman sang sabat si Congressman Jerry Treñas may kaangtanan sa ginpahayag ni Mayor Espinosa nga pagpanginwala sa pagpadelete sang pangalan sa graduation sang TIIC. Sa interview sang Bombo Radyo kay Congressman Treñas. iya ginpahayag nga mahimo madeny sang alkalde ang tanan apang amo ini ang kamatuoran.
Suno kay Treñas, siya kuntani ang magaserbe nga keynote speaker apang ginpanas na ang iya ngalan rason nga ginhambalan nalang niya ang iya sekretarya nga indi nalang siya makakadto sa graduation. Dugang pa ni Trenas, isa ka insider ang nagpanugid sa iya natuhoy sa pagpapanas sang alkalde sang iya pangalan sa graduation program sang nasambit nga buluthuan
