Mahimo nga may yara sang bayolasyon ang mga aktibidad sang pag-ulikid program ni Iloilo City Mayor Jose Espinosa III, pananglitan nga wala ini nakafile sang Certificate of Exemption sa Commission on Elections (Comelec).
Sa interview sang Bombo Radyo kay Mr. Jonathan Sayno, Election Officer 2, sang City Comelec, iya ginpahayag nga kun wala naga-apply sang exemption ang programa sang alkalde, nagalapas ini sa Omnibus Election Code.
Suno kay Sayno, wala siya nakahibalo kun bala nagpasa gid man sang application ang Pag-ulikid program bangud ang nasambit nga exemption ang gina file mismo sa Regional Office sang Comelec.
Nagapatigayun sang nagkalain-lain nga serbisyo para sa mga pumuluyo ang Pag-ulikid program sa pila ka mga barangay sa distrito sang Jaro kag Molo.
Samtang sa interview sang Bombo Radyo kay Atty. Jose Nick Mendros, Regional Dircetor sang Comelec Region 6, iya ginpahayag nga indi siya sigurado kun bala nag-apply kag kun naaprobahan ang certificate of exemption sang nasambit nga grupo.
Suno kay Mendros, naghatag sadto sang legal advice sa grupo ang legal department nga magfile sang exemption bangud sila ang nasakop man sang banning.
Dugang pa ni Mendros, ginadumilian ang mga kandidato kag political parties nga magpasakop ukon yara ang ila presensya sa mga aktibidades kaangay sang pagpanghatag sang bulig sa mga tawo agud malikawan ang ila pagpromote sang ila kandidatura.
