Senior citizen nga stroke victim patay, iloy sini napilasan ka napaso sang masunog ang ila balay sa Dingle Iloilo

Natumod na sang Bureau of Fire Protection (BFP) ang rason sang sunog nga nagluntad sa isa ka compound sa Jalandoni Street Brgy. Poblacion, Dingle Iloilo.

Nahibaluan nga sa nasambit nga sunog, isa ang patay kag 3 ka mga balay ang totally burned.

Ang patay amo si Remie Corpus, 60, sa diin na paralisado ini matapos na stroke samtang pilason naman ang iloy sini nga si Corazon Corpuz, 87, sa diin naga istar lang sila sa isa ka balay.

Sa interview sang Bombo Radyo kay SFO3 Carlos Magbanua, hepe sang Dingle Fire Station, iya ginpahayag nga wala makagwa ang biktima sa ila balay sang matabo ang sunog.

Naghalin ang kalayo sa balay sang biktima kag naglaton sa iya mga kaiping nga balay nga ginapanag iyahan nanday Amalia Lumbo kag Rex Corpuz.

Suno kay Magbanua, nagtuob ang biktima kag wala niya mapatay ang baga rason nga nagmakot ang kalayo.

Nagdangat naman sa P175,000 ang halit nga natuga sang sunog.