ILOILO CITY – Isa-isa nga ginsabat ni Iloilo City Lone District Cong. Jerry Treñas ang akusasyon sang bilas nga si Iloilo City Mayor Jose Espinosa III.
Ini matapos ang pahayag sang alkalde nga si Cong. Treñas ang butigon kag wala sang kabalaslan.
Sa interview sang Bombo Radyo kay Treñas, iya ginpahayag nga indi matuod ang pahayag ni Espinosa.
Sa pagkamatuod suno kay Treñas, nakapromisa na siya nga indi na magbalik sa pulitika kun maayo lang ang pagdumala sa syudad.
Bangud nga masami lang nagapahubog kag nagapangape si Mayor Espinosa, nagdesisyon siya nga magbalik sa pulitika matapos ang pagpangonseho sa mga Punong Barangay.
Sa pagkamatuod suno sa natungdan, ginagamit pa ni Mayor Espinosa ang salakyan sang syudad sa pagpadulong sa balay-ilimnan kag kapehan.
May kaangtanan naman sa P100 million-deal, ginpahayag ni Treñas nga may yara sang mga pamatuod nga ginpatawag ni Ginang Gina Sarabia-Espinosa ang iya Chief of Staff nga si anay Punong Barangay Jonas Belocello.
Samtang, ginpanginwala naman ni Cong. Treñas ang akusasyon sang bilas nga nagpamalibad siya nga ihaya sa ila balay ang napatay nga ugangan.
Sa pagkamatuod suno kay Treñas, ginkasugtan mismo sang mag-ululutod nga Sarabia nga sa isa lang ka punerarya ihaya ang bangkay apang nagpamilit gid suno sa iya ang bayaw nga si Gina nga sa ila balay ihamyang ang bangkay.
Agud nga makalikaw sa gamo, ila na lang nga gin-ugyunan ang luyag sang iya bayaw.
