JANIUAY, ILOILO -Gin-athag sang legal counsel ni Janiuay, Iloilo Vice Mayor Jojo Lutero nga indi peke ang ila ginpaguwa nga Supreme Court decision batok kay anay Mayor Frankie Locsin.
Sa interview sang Bombo Radyo kay Atty. John Nuñez, legal counsel ni Vice Mayor Lutero, iya ginpahayag nga indi peke ang kopya sang Supreme Court decision nga ila ginbuyagyag.
Agud nga mapamatud-an kun sin-o ang nagasugid sang husto suno kay Atty. Nuñez, mahimo man nga ma-verify sa Supreme Court kun bala matuod nga may yara na sang desisyon sa graft case batok kay Locsin.
Gin-athag man ni Atty. Nuñez nga wala sang lamud pamulitika ang ila pagpaguwa sang nasambit nga isyu sa baylo, ila lamang nga ginapahibalo sa publiko kun ano ang matuod.
Sa pagkamatuod suno sa natungdan, mismo si anay Mayor Locsin ang nagbuyagyag sang kaugalingon nga kaso sa isa ka debate rason nga ila nga gin-verify sa Supreme Court kun bala ano na ang status sang nasambit nga kaso.
Nahibalu-an nga ang Graft case nga ginkaulamiran sang anay alkalde ang may kaangtanan sa pagbakal sang bulong nga nagabalor sang P15 million.
Sanday Lutero kag Locsin ang pila lamang sa magabunggu-anay sa pagka-alkalde sang Janiuay, Iloilo sa midterm elections.
