ILOILO CITY – Gintudlo ni Iloilo City Lone District Cong. Jerry Treñas ang iya mga kasumpong sa pulitika nga amo ang nagpalapta sang sala nga impormasyon batok sa iya.
Ini matapos ang paglapta sang impormayson nga na-ospital si Cong. Treñas.
Sa interview sang Bombo Radyo kay Treñas, iya ginpahayag nga wala sang kamatuoran nga siya ang gindala kag gin-admit sa ospital.
Sa pagkamatuod suno kay Treñas, masako siya sa pagpatigayon sang campaign rally sa syudad sang Iloilo kaupod ang iya mga kaalyado nga pulitiko.
Kasubong suno sa iya nga desperado nga magdaug ang iya mga kasumpong sa pulitika kag kinahanglan pa nga magpalapta sang sala nga impormasyon.
Kadungan sini, ginpahayag sang mamalidha nga ginpatawag pa ang mga job hire sang Iloilo City Government agud nga indi makatambong sa campaign rally sang ila grupo nga ginpatigayon sa Plaza Libertad.
Samtang, ginpanginwala naman ni Iloilo City Mayor Jose Espinosa III nga siya ang nagpalapta nga na-ospital ang iya nga bilas.
Sa pagkamatuod suno kay Espinosa, wala siya makahibalo tuhoy diri kag ang iya nahibalu-an amo nga masako sa pagpangampanya si Cong. Treñas agud nga mabatak man ang iya kadidatura.
Kasubong suno sa alkalde nga gina-into lang ni Cong. Treñas ang iya kaugalingon paagi sa pagpato-patu sa iya mga kasumpong sa pulitika.
Kadungan sini, gin-athag man ni Espinosa nga wala niya ginpatawag ang mga job hire agud lamang nga indi pagpatambungon sa campaign rally sang iya bilas.
