ILOILO CITY – Ginatawag ni Iloilo City Lone District Cong. Jerry Treñas nga dinamak nga sahi sang pamulitika ang ginahimu sang iya mga kasumpong sa pulitika.
Ini matapos ang paglapta sang impormasyon sa social media tuhoy sa ginapahayag pag-angkon sang madamo nga kirida sang mamalidha.
Sa interview sang Bombo Radyo kay Treñas, iya ginpahayag nga ‘below the belt’ na ang mga akusasyon nga ginapaguwa sang iya mga kasumpong agud nga gub-on ang iya kandidatura.
Ginpahayag ni Treñas nga indi man siya ‘rabbit’ ukon kuneho agud nga mag-angkon sang madamu nga partner.
Ginhangkat pa sang mamalidha ang mga nagapatu-patu nga itudlo ang iban pa niya nga pamilya agud nga masaguran man niya.
Magluwas sa pag-angkon sang madamu nga kirida, ginpahayag man sang mamalidha nga madamu pa sang mga malaw-ay nga istorya ang ginapatu-patu sa iya kasubong sang impotent, tagumatayon, illegal drug protector, madali na lang nga presuhon kag agi.
Nahibalu-an nga una na nga naghatag sang pahayag si Dr. Pacita Gonzalez sa iya mga kasumpong sa pagka-alkalde sa syudad sang Iloilo.
Suno kay Gonzalez, si Cong. Treñas ang nagapangulintas sang kaso sa Sandiganbayan kag Ombudsman samtang si Iloilo City Mayor Jose Espinosa III naman ang nagapadayaw sang iya calamity fund kag nagtuga sang pagbakho sa mga job hire sang syudad.
Magluwas diri, gin-akusaran man ni Gonzalez ang duha nga lunsay naangot sa illegal nga druga.
