ILOILO – Ginabantayan sang Philippine National Police (PNP) ang ‘vote buying’ sa Western Visayas samtang nagahilapit ang May 13 midterm election.
Sa exclusive interview sang Bombo Radyo kay Police Brigadier General John Bulalacao, Director sang Police Regional Office (PRO) 6, iya ginpahayag nga magluwas sa ‘intense political rivalry’ kag presensya sang New People’s Army (NPA) kag Private Armed
Groups, sakop man sa ila katungdanan amo ang pagbantay kun bala sanday sin-o nga mga pulitiko ang nagapamakal sang boto.
Ginpahayag ni Bulalacao nga may yara siya sang nabaton nga impormasyon nga may mga pulitiko nga nagapamakal sang boto paagi sa paghatag sang groceries kag kwarta nga may dala pa nga sample ballots.
Nagpamalibad ang Regional Director nga ihingadlan kun ano nga mga lugar ang may yara sang madata nga ‘vote buying’.
Panugyan ni Bulalacao sa publiko, batunon lang ang ginahatag sang pulitiko apang botohon ang nahamut-an nga kandidato.
Nauna na nga ginpahayag sang natungdan sa isa ka Press Conference nga iya ipausisa ang ginapahayag pagpamakal sang boto sang pamilya Garin sang 1st district kag Biron sang 4th District sa probinsya sang Iloilo.
Santo sa nagalapta nga laragway, makit-an ang campaign materials ni Iloilo 4th District Cong. Ferjenel Biron kag anay Department of Health (DOH) Sec. Janette Garin nga ginpadukot sa bihon samtang ginpadukot naman sa sardinas ang campaign material ni Vice Gov. Christine Garin.
Nahibaluan nga una na nga ginpahayag sang COMELEC nga hugot nga ginadumili-an ang vote buying paagi sa paghatag sang groceries, kwarta ukon anu man nga butang kabaylo sang boto.
Yari ang nauna nga pahayag ni Bulalacao sa Press Conference tuhoy sa ginapahayag vote buying sang pamilya Garin kag Brion:
Samtang, yari naman ang pahayag ni Bulalacao tuhoy sa pagbantay sa vote buying:
