ILOILO – Ginakabig ni Iloilo Governor Arthur Defensor Sr. nga mahigko ang pamulitika sa pungsod ilabi na sa probinsya sang Iloilo.
Sa interview sang Bombo Radyo kay Gov. Defensor, iya ginpahayag nga indi niya maagwantahan ang dalagan sang pulitika sa probinsya sang Iloilo bangud sa mga black propaganda sang iban nga pulitiko.
Sa tagsa ka election period suno kay Gov. Defensor, nagagasto gid ang mga pulitiko para sa political advertisers agud lamang nga gub-on ang kandidatura sang kasumpong sa pulitika.
Kasubo man panumdumon suno kay Gov. Defensor nga madata ang ‘vote buying’ ukon ang pagpamakal sang boto sang mga kandidato kag ginahingalitan ang kaimulon agud nga makakuha sang daku nga boto.
Suno sa gobernador, bugalon siya nga iya nalampuwasan ang pulitika nga wala naggasto sang minilyon ka pesos para lamang gub-on ang kandidatura sang iya kasumpong sa pulitika.
Samtang, wala na nanibag-o pa si Iloilo 4th District Cong. Ferjenel Biron sa mga akusasyon batok sa iya sang mga kasumpong sa pulitika.
Sa interview sang Bombo Radyo kay Cong. Biron, iya ginpahayag nga kinaandan na sa tagsa ka election period nga ang mga kandidato ang nagabayluhanay sang malain nga akusasyon sa isa kag isa.
Sa iya bahin suno kay Cong. Biron, ginalauman na niya ang pagguwa sang ‘fake news’ kag mga malain nga akusasyon gikan sa iya mga kasumpong sa pulitika ilabi pa nga pila na lang ka adlaw kag ‘election day’ na.
Sa pihak sini, ginpadayaw sang natungdan ang iya nakuha nga mga ratings sa mga ginapatigayon nga survey.
