CONCEPCION, ILOILO – Lima ka search warrant ang natigayon nga maserbe sang Concepcion PNP sa Concepcion, Iloilo.
Sa exclusive interview sang Bombo Radyo kay Police Major Jonah Galicha, hepe sang Concepcion Municipal Police Station, iya ginpahayag nga subong nga adlaw, Mayo 12, duha ka search warrant implementation ang natigayon sa Brgy. Nipa kag Brgy. Lo-ong.
Sa Brgy. Nipa, subject sang search warrant amo si Roger Villanueva bangud sa ginapahayag paghupot sang indi lisensyado nga armas-luthang.
Sa Brgy. Lo-ong naman, subject sang search warrant implementation amo si Samson Narciso nga ginatudlo nga nagahupot man sang indi lisensyado nga armas-luthang.
Sa duha ka subject, si lang Narciso ang gindakop matapos nga nakuhaan sang bala sang shot gun.
Kahapon naman nga adlaw, Mayo 11, tatlo ka mga search warrant ang ginserbe sa Brgy. Agnaga sa diin subject amo sanday Punong Barangay Edgardo Oro, Barangay Administrator Benny De Guzman kag Chief Tanod Arnel Ambros.
Nakuha kay Oro ang isa ka .45 caliber pistol kag mga bala, rifle grenade naman ang nakuha kay De Guzman kag 3 ka bala sang .45 caliber pistol, home-made rifle, bala sang M2O3 grenade kag 6 ka sachet sang ginapatihan shabu ang nakuha kay Ambros.
Ang mga nakuhaan sang indi lisensyado nga armas, bala kag shabu ang ginkustodiya sang Concepcion PNP kag pasakaan sang nagakaigo nga kaso.
