NUEVA VALENCIA, GUIMARAS – Buluntaryo nga ginsungka sang isa ka mangingisda ang ginapanag-iyahan nga armas-luthang kasunod sang reklamo tuhoy sa iya masami nga pagpalupok sa Sitio Sambulawa, Brgy. Napandong, Nueva Valencia, Guimaras.
Sa exclusive interview sang Bombo Radyo kay Police Captain Henry Gaborno, hepe sang Nueva Valencia Municipal Police Station, iya ginpahayag nga ang nadakpan amo si Prudencio Galas Sabobo, 44 anyos sang nasambit nga lugar.
Ginpahayag ni Gaborno nga bag-o pa man nadakpan, nagapatigayon sila sang checkpoint sa kaiping nga barangay sang nakabaton sang reklamo tuhoy sa pagpalupok ni Sabobo sang iya armas-luthang.
Sa ila nga pag-abot sa lugar, wala man nagpakatig-a si Sabobo nga isungka ang ginapanag-iyahan nga 12 gauge shotgun nga wala na sang serial number.
Bangud sini, pasakaan sang kaso nga paglapas sa Illegal Possesion of Firearms si Sabobo.
Samtang, madamu naman ang reklamo nga nabaton sang Nueva Valencia PNP tuhoy sa ‘vote buying’.
Suno kay Gaborno, madamu sila sang may ginrepondehan nga ‘vote buying’ reports apang negatibo ang resulta.
Sa pihak sini, ginpahayag sang hepe nga wala sila sang pasin-uhon kun pagpamakal sang boto ang pagahambalan.
