MAASIN, ILOILO – Ginatahod ni Maasin, Iloilo Mayor Mariano Malones ang nangin desisyon sang pumuluyo sa nakaligad nga midterm elections.
Ini matapos nga nalutos siya sa pagka bise alkalde sa Maasin, Iloilo batok kay SB Member Itik Albacete.
Sa interview sang Bombo Radyo kay Mayor Malones, iya ginpahayag nga wala siya sang kalain sang buot sa pihak sang kalutusan sa pulitika.
Ini bangud nga suno kay Mayor Malones, nagserbe siya bilang elected official sang Maasin kag sa 3rd District sa probinsya sang Iloilo sa sulod sang 18 ka tuig.
Kasubong suno kay Malones nga kumpleto na ang iya kabuhi bilang isa ka pulitiko kag negosyante.
Magluwas sa iya kalutusan, nalutos man sa pagka-alkalde sa Maasin ang iya anak nga si Atty. Sweet Malones batok kay Vice Mayor Francis Amboy.
Mahimo suno kay Mayor Malones nga nalutos ang anak nga si Atty. Sweet bangud sa kakulang sang tion sa pagpangampanya.
Ini bangud nga sang campaign period, nagabusong si Atty. Sweet kag sang nagligad lang nga Mayo 15 nagbata.
Sa pihak sini, ginakabig naman sang alkalde nga ‘blessing in disguise’ ang kalutusan sang anak bangud nga matutukan na niya ang kaugalingon nga pamilya.
Indi man lipod nga si Mayor Malones ang isa sa mga ginhingadlan ni Presidente Rodrigo Duterte nga Narco-politician apang para sa alkalde, wala ini nakaapekto sa iya kandidatura bangud nga indi man ini matuod.
Pagkatapos sang iya termino suno kay Mayor Malones, mangin masako man sa gihapon ang iya kabuhi bangud sa iya mga negosyo.
Yari pamati-an ang reaksyon ni Malones sa iya kalutusan sa pulitika:
Yari naman ang pahayag ni Malones sa kalutusan sang iya anak nga si Atty. Sweet Malones:
Samtang, may pahayag man si Malones tuhoy sa pagtawag sa iya nga narco-politician:
Pamati-an ang pahayag ni Malones tuhoy sa iya plano pagkatapos sang iya termino bilang alkalde sang Maasin:
May yara man sang mensahe si Malones sa mga pumuluyo sang Maasin:
