NUEVA VALENCIA, GUIMARAS – Wala pa sa gihapon nakilala ang lalaki nga nasapwan-patay sa Brgy. Lanipe, Nueva Valencia, Guimaras.
Sa interview sang Bombo Radyo kay Police Captain Henry Gaburno, hepe sang Nueva Valencia Municipal Police Station, iya ginpahayag nga may mga igo sang bala ang biktima nga nakasuksuk sang itom nga T-hirt kag maong nga pantalon.
Santo sa pag-usisa, ang biktima ang ginabanta nagataas sang 5 feet, naga-edad sang 35 tubtub 40 anyos kag may madamu nga tattoo sa lawas.
Lakip sa mga nakuha sa bangkay amo ang lighter kag kwarta nga P250 samtang may nakita naman nga mga basiyo sang bala sang .45 caliber pistol sa crime scene.
Ginapahayag nga bag-o pa man nasapwan ang biktima, may nakita pa ang mga pumuluyo nga pick-up sa lugar kag nabati-an na lang ang asud-asud nga lupok.
