ILOILO CITY – Wala pa nabaton ni City Social Welfare and Development Office (CSWDO) Chief Gene Garingalao ang sulat gikan sa Department of Social Welfare and Development (DSWD).
Ini ang may kaangtanan sa pagpabalik sang kapin P2 million nga social pension nga ginpanagtag sa mga Senior Citizen sa syudad sang Iloilo matapos ang ginpatigayon nga audit sang Commission on Audit (COA).
Sa interview sang Bombo Radyo kay Garingalao, iya ginpahayag nga magkaupod sila ni DSWD-6 Regional Director Ma. Evelyn Macapobre sa duha ka adlaw nga seminar sa Roxas City apang wala man nila maistoryahan nga duha ang tuhoy sa sulat.
Sa pagkamatuod suno kay Garingalao, nagalibog ang iya ulo kun nga-a wala pa siya nakabaton sang nasmabit nga sulat nga napetsahan pa sang Mayo 9 apang nakakuha na sang kopya ang Bombo Radyo.
Sa pagpaathag ni Garingalao, indi obligado ang Iloilo City Government nga magbalik sang P1,830,000 nga social pension bangud nga wala man ini nasaad sa Memorandum of Agreement (MOA) sang DSWD kag Local Government Unit (LGU).
Makatilingalahan suno kay Garingalao nga sa syudad sang Iloilo lamang ang ginakwestyon sang COA bangud nga may ginpanagtag man nga social pension sa iban nga lugar sa pungsod.
Kadungan sini, gin-ako sang natungdan nga bangud sa kadamuon sang ‘beneficiary’, indi maid-iran sang ‘validators’ ang datus.
Nahibalu-an nga santo sa COA audit, natukiban nga 420 sa 13,190 ka mga social pensioner ang makabig nga non-eligible beneficiary.
