ILOILO CITY – Ginpangita na sang otoridad ang lima ka mga suspek nga nagkawat sang masobra P500,000 nga balor sang alahas sa Aljun Jewelry Store sa isa ka mall sa Guanco St., Iloilo City.
Sa interview sang Bombo Radyo kay Police Lt. Col. Jonathan Pablito, hepe sang Police Station 1, iya ginpahayag nga theft ukon pagpangawat kag indi inside job ang natabo nga krimen santo sa mga sirkumstansya nga ila nakuha.
Kun basehan suno kay Pablito ang kuha sang Closed Circuit Television (CCTV) camera, makita gid ang guya sang lima ka mga suspek nga nagkawat sa isa ka box nga naga-unod sang 46 ka mga singsing.
Bangud sini, nagalaum naman si Pablito nga madakpan gilayon ang mga suspek.
Sadto pa man suno sa hepe, ginpanugyan na nila sa tagdumalahan sang nasambit nga jewelry store nga magsaylo sa mas ‘safe’ nga balaligyaan kag hugtan ang seguridad agud nga indi na malutsan apang wala man ini gintuman.
May intelligence report man sila suno sa natungdan nga may yara sang robbery group sa syudad sang Iloilo rason nga ila na nga ginpaandaman ang tanan nga jewelry store kag bangko nga mag-aligmat.
