ILOILO CITY – Desidido nga magpasaka sang kaso ang pamilya sang isa ka menor de edad nga ginpaarakan sang luthang sang ginapahayag pulis sa Brgy. Tacas, Jaro, Iloilo City.
Sa interview sang Bombo Radyo kay Glenn Jamilo, pakaisa sang menor de edad, iya ginpahayag nga ginpasibangdan sang pulis nga ginkilala kay certain Archie Buga nga naassign sa Criminal Investigation and Detenction Group (CIDG) ang iya pakaisa nga nagpangawat.
Santo sa pagpaathag sang natungdan, ginhuna-huna sang nasambit nga pulis nga ginkawat sang iya pakaisa ang electric sander.
Sa pagkamatuod suno kay Jamilo, ang tinawo sang amay sang pulis ang nagsugo sa menor de edad nga ibaligya ang nasambit nga gamit nga ginapanag-iyahan sang tatay sang pulis.
Agud nga makalikaw sa gamo, may yara sang kasugtanan ang magtimbang nga bahin apang hinali lang nga ginpalukpan sang pulis ang menor de edad sang makapila ka beses.
Nakadalagan ang menor de edad tubtub nga nakalab-ot sa Brgy. San Isidro kag nakapangayo sang bulig.
Santo sa pagpangusisa, ang menor de edad ang may yara na sadto pa man sang record nga pagpangawat.
Nagpamalibad naman ang pulis nga maghatag sang pahayag tuhoy sa nasambit nga isyu samtang yara naman sa kustodiya sang Women’s and Children’s Protection Desk (WCPD) sang Jaro Police Station ang menor de edad.
