ILOILO CITY – Pagabungkagon na ang Mayor’s Squad kadungan sang pagtapos sang Espinosa administration sa Hunyo 30.
Sa interview sang Bombo Radyo kay outgoing Iloilo City Mayor Jose Espinosa III, iya ginpahayag nga dulaon na ang Mayor’s Squad sa tion nga matapos na ang iya termino.
Ginpahayag ni Mayor Espinosa nga magapaguwa siya sang executive order tuhoy sa pagbungkag na sang Mayor’s Squad kag ang mga personnel nga naka-assign diri ang igabalik na sa ila mother unit.
Ang duha ka mga salakyan suno sa alkalde ang igahatag sang syudad sang Iloilo sa Philippine National Police (PNP).
Ginpahayag man sang natungdan nga ang Mayor’s Squad ang makabig nga ‘identity’ sang iya nga pagpamuno sa syudad sang Iloilo.
Nakadepende na man sa magabulos nga Treñas administration kun ano nga programa ang patigayunon para sa kaayuhan sang syudad sang Iloilo.
Nahibalu-an nga una na nga ginpahayag ni incoming Iloilo City Mayor Jerry Treñas nga ang duha ka mga salakyan sang Mayor’s Squad ang gingamit sa pagpangampanya kag personal nga interes sang isa ka pulitiko.
