ILOILO CITY – Ginakabig sang Iloilo City Police Office (ICPO) nga maayo nga lihok ang pagtanyag sang Barangay Officials sang Don Esteban, Lapuz, Iloilo City sang P10,000 nga padya sa makatudlo sa mga drug personality sa nasambit nga lugar.
Sa interview sang Bombo Radyo kay ICPO Director Police Col. Martin Defensor Jr., iya ginpahayag nga ang Don Esteban ang labing una kag naga-isahanon sa 180 ka mga barangay sa syudad nga nagtanyag sang padya sa makatudlo sang nagabaligya ukon nagagamit sang illegal nga druga.
Ginpahayag ni Defensor nga magapakig-angot ang ICPO sa barangay officials sang nasambit nga lugar para sa tul-id nga ihibalo tuhoy sa nasambit nga lihok.
Una na ginpahayag ni Defensor nga makabulig sa kampanya sang Philippine National Police (PNP) ang nasambit nga lihok sang Brgy. Don Esteban agud matapna ang pagduging sang illegal drugs.
Ang Brgy. Don Esteban ang makabig nga moderately-affected kun illegal drugs ang pagahambalan santo sa December 2018 report sang Philippine Drug Enforcement Agency (PDEA 6).
