STA. BARBARA, ILOILO – Nagapadayon ang ‘backtracking’ sang otoridad sa kaso sang pagluthang-patay sa isa ka lalaki nga nasapwan sa Brgy. Bitaog Taytay, Sta. Barbara, Iloilo.
Sa interview sang Bombo Radyo kay Police Captain Rey Pabalan, hepe sang Sta. Barbara Municipal Police Station, iya ginpahayag nga wala pa sila sang may nakuha nga mga witness agud nga makabulig sa pagsolbar sa pagpatay kay Colt Premarion, 23, sang Brgy. Pasig, Lambunao, Iloilo.
Ginpahayag ni Pabalan nga ila pa lang nga nakuha amo ang footage sang Closed Circuit Television (CCTV) sa Lambunao sa diin nakita nga naga-isahanon lang si Premarion nga nagasakay sa motorsiklo.
Ang motorsiklo nga ginamaneho sang biktima suno kay Pabalan ang lain ipanggid sa motorsiklo nga nakuha sa Sta. Barabra kun sa diin nasapwan ang biktima.
Mahimo suno kay Pabalan nga kinawatan ang motorsiklo nga nakita sa crime scene.
Sa subong suno sa hepe, bisan mapin-ot ang impormasyon tuhoy sa pagpatay kay Premarion, ila nga ginatinguhaan nga makakuha sang circumstancial evidence agud nga mahibalu-an ang motibo sa krimen.
