ILOILO CITY – Igapaidalom sa laboratory examination ang tanan nga recoveries nga nakuha sa buy bust operation sa Mandurriao, Iloilo City.
Ini ang kasunod sang kamatayon sang durugista nga si Giovanni Guancia Mejica, 37, sang Block 10, Lot 5, Imperial 6, Guzman-Jesena, Mandurriao, Iloilo City.
Sa interview sang Bombo Radyo kay Police Major Hilarion Roga, pinuno sang Scene of the Crime Operatives (SOCO), iya ginpahayag nga igapaidalom sa laboratory examination ang mga nakuha nga armas-luthang, nanari-sari nga bala, ginabanta 40 ka sachet sang suspected shabu, granada kag iban pa nga drug paraphernalia.
Ginpahayag ni Roga nga ang armas-luthang kag ang mga sachet sang ginapatihan shabu ang nakuha malapit sa bangkay ni Mejica.
Santo sa pagpangusisa sa sulod sang kwarto ni Mejica, ginpahayag ni Roga nga wala sang buho ang dingding nga tuga sang igo sang bala.
Samtang, suno naman kay Police Major Marlon Valencia, hepe sang Mandurriao Police Station, iya ginpahayag nga madugay na nga ginabantayan ang hulag ni Mejica kag kahapon lang natigayon nga mabaklan sang shabu.
Ginpahayag ni Valencia nga daku ang sakop ni Mejica sa pagbaligya sang illegal drugs.
Nagpamalibad naman si Valencia nga ihingadlan ang supplier sang shabu bangud nga nagapadayon pa ang ila imbestigasyon.
