ILOILO CITY – Wala na gin-usisa sang Scene of the Crime Operatives (SOCO) ang bangkay sang soltero nga nagaling sang buhi sa isa ka factory sang frozen foods sa Brgy.Mansaya, Lapuz, Iloilo City.
Sa interview sang Bombo Radyo kay Police Senior Master Sergeant Alain Selda, imbestigador sang Lapaz Police Station, iya ginpahayag nga gilayon sila nga nagpangayo sang bulig sa SOCO agud kun tani nga mahibalu-an kun may yara sang foul play ukon wala sa kamatayon ni Jomar Junco, 18, sang Laua-an, Antique.
Suno kay Selda, nagpanugyan ang SOCO nga usisaon anay sang Lapaz PNP ang natabo nga insidente.
Kun may foul play, amo na lang ugaling ang pag-imbestigar sang SOCO sa crime scene.
Santo sa pagpangusisa sang Lapaz PNP, ginpahayag ni Selda nga wala sang foul play sa insidente santo sa mga natipon nga mga impormasyon.
Samtang, suno naman kay Joselor Jaleco, tag-iya sang factory sang frozen foods, iya ginpahayag nga mabuot nga sahi sang tawo si Junco.
Sa pagkamatuod suno kay Jaleco, ang mga himata ni Junco ang yara man naga-istar sa iya balay kag wala man siya sang may isaway.
Bangud bag-o pa lang sa trabaho si Junco, ang iya lamang trabaho amo ang pagpamutos kag ang pagpangselyo sang finished products.
Makatilingalahan lang suno kay Jaleco kun nga-a nagmato-mato si Junco sa pag-operate sang meat mixer bisan nga wala sang tul-id nga ihibalo sa paggamit sini.
