ILOILO CITY – Nadakpan sang gintingob nga pwersa sang nagkalain-lain nga unit sa idalom sang Police Regional Office (PRO) 6 kag 61st Infantry Battallion sang Philipine Army ang anay Commanding Officer sang Roger Mahinay Command, Komiteng Rehiyon-Negros sang Communist Party of the Philippines -New People’s Army (CPP-NPA).
Mismo si PRO-6 Director Police Brigadier Gen. John Bulalacao ang nagpresentar sang nasambit nga accomplishment.
Paagi sa warrant of arrest, nadakpan si Baltasar Cresosto Saldo ukon mas kilala nga Virgilio Paragan alyas Hassan, 54, sang Brgy. Sto. Angel, Dumalag, Capiz.
Si Saldo ang may kaso nga duha ka counts sang attempted murder kag murder.
Masobra man sa pulo ka tuig nga nagpalagyo si Saldo kag sang Hunyo 23, 2019 lang nadakpan.
Santo sa pagpangusisa, si Saldo ang nangin katapo sang CPP-NPA sang 2000 tubtub 2004 kag naangot sa madamu nga kaso kasubong sang arson kag pagpamatay.
Nalakip man si Saldo sa listahan sang mga Most Wanted Person sang Directorate for Intelligence sang Philippine National Police (PNP).
Nauna na nga nagpaguwa sang joint order ang Department of Interior and Local Government (DILG) kag Department of National Defense (DND) sa diin may yara sang padya nga P1,050,000 sa makatudlo sa ginahamtangan ni Saldo.
