ILOILO CITY – Ginpanindugan sang Police Regional Office (PRO) 6 nga wala sang mistaken identity nga natabo sa pagdakop sa ginapahayag anay commanding officer sang Communist Party of the Philippines – New People’s Army (CPP-NPA).
Sa interview sang Bombo Radyo kay Police Lt. Col. Joem Malong, tagpamaba sang PRO-6, iya ginpahayag nga bisan pa matuod nga may yara sang nagapahayag nga mistaken identity ang pagkadakop kay Baltasar Cresosto Saldo, 54, sang Brgy. Sto. Angel, Dumalag, Capiz apang may yara man sila sang witness nga makapamatuod nga ang natungdan amo si Virgilio Paragan alyas Hassan, anay commanding officier sang Roger Mahinay Command-Komiteng Rehiyon Negros sang CPP-NPA.
Ginpahayag ni Malong nga indi madali-dali nga ideklarar nga mistaken identity ang natabo bangud nga maga-agi pa ini sa nagakaigo nga imbestigasyon.
Ginpasalig man ni Malong nga kun may yara gid man sang kapaktahan ang mga otoridad nga nagdakop kay Saldo, indi magduha-duha ang PRO-6 nga magpasaka sang kaso.
