ILOILO CITY – Madugay na nga nakahibalo si incoming Iloilo City Mayor Jerry Treñas nga indi mag-upod sa oath-taking ceremony si Iloilo City Councilor Candice Tupas.
Ini ang ginbuy-an nga pahayag ni Tupas may kaangtanan sa indi niya pagsumpa kaupod si Iloilo City Councilor Mandrie Malabor sa oath-taking ceremony subong nga adlaw, Hunyo 28, sa Iloilo Convention Center.
Sa interview sang Bombo Radyo kay Tupas, iya ginpahayag nga wala siya nagsumpa kaupod ang iban pa nga elected officials sa syudad sang Iloilo bangud nga nakasumpa na siya kay Sen. Juan Miguel Zubiri kag Sen. Cynthia Villar.
Sa pagkamatuod suno kay Tupas, naka-istoryahanay na sila nga daan ni Treñas tuhoy diri kag nagpasugot man ang incoming Iloilo City Mayor.
Ginpahayag ni Tupas nga si Treñas ang nag-engganyo sa iya nga magsulod sa pulitika kag bisan pa nga nagbulagay sila sang partido sang nakaligad nga midterm elections, wala sila sang kala-in sang buot sa isa kag isa.
Tion na suno sa konsehal nga magpatawad bangud nga natapos na ang eleksyon.
