ILOILO CITY-Kapigaduhon kag kinagamo sa Jolo, Sulu ang rason sa pagpadulong sang isa ka pamilya sang Badjao sa Syudad sang Iloilo.
Sa interview sang Bombo Radyo Iloilo kay alyas Koba, iya ginpahayag nga upod niya nga nagpadulong diri sa syudad ang iya anom ka mga kabataan bangud wala sila sang pangabuhian didto kag nagaginamo sa ila lugar.
Suno kay Koba, isa ka semana na sila nga naga-istar sa kahilamunan sa likod sang Tagbak Terminal sa Jaro, Iloilo City.
Ginpahayag niya nga nagapangayo-kayo sila sang kwarta sa mga tawo para makakaon.
Gindugang pa niya nga sa sulod sang isa ka adlaw,makatipon sila sang 100 tubtob 150 pesos kag kun may sobra sa ila kwarta, ila ini ginapadala sa Jolo, Sulu bilang pangbayad man sa ila kautangan didto.
Suno pa sa iya, wala sila nabudlayan diri sa Iloilo bangud maalwan man sa paghatag ang mga tawo.
Samtang, ginatudluan naman niya ang iya kabataan nga indi magpanakit sa mga tawo kun indi sila paghatagan sang kwarta.
Matandaan nga sang damlag lang, isa ka estudyante ang gintampa sang bata nga Badjao bangud wala niya ini ginhatagan sang kwarta.
