ILOILO CITY – Nagapangatubang sang kaso nga alarm and scandal ang pito ka mga pamatan-on nga nag-inaway sa Smallville Complex sa Mandurriao, Iloilo City.
Ang mga naulamid sa insidente amo ang grupo nanday John Christian Jarandilla, 21, James Jarandilla, 23, sang Brgy. Ungka 2, Pavia, Iloilo, Gregorio Tomagan III, 21, sang Parc Regency Subd., Brgy. Ungka 2, Pavia, Iloilo, Jose Mark Villas, 20, sang Brgy. Talon, Altavas, Aklan kag ang grupo nanday Stevin Madera, 22, Rizal St., Maasin, Iloilo, Jose Martin Sadava, 19, sang Brgy. Rizal Ilawod, Cabatuan, Iloilo kag Addrienne Cablas, 19, sang Brgy. Talacuan, Leon, Iloilo.
Sa interview sang Bombo Radyo kay Police Major Marlon Valencia, hepe sang Mandurriao Police Station, iya ginpahayag nga natabo ang insidente pasado 3:00 kaina sang kaagahon.
Suno kay Valencia, babayi ang ginhalinan sang away sa tunga sang duha ka grupo.
Ginpahayag ni Valencia nga sa sulod sang Prism Resto Bar, may yara na nga daan sang pagsuya-ay sa tunga sang mga arestado tubtub nga may natabo nga komosyon sa sagwa sang nasambit nga commercial establishment.
Mismo ang mga bouncer sang nasambit nga commercial establishment ang nagdakop sa mga pamatan-on kag ginturn-over sa nagresponde nga mga pulis.
