ILOILO CITY – Ginbawi-an sang kabuhi ang isa sa duha ka mga biktima sang shooting incident sa Brgy. Taft North, Mandurriao, Iloilo City.
Ang mga biktima ang ginkilala nga si Christopher Jinon, 32, sang Brgy. Bularan, Banate, Iloilo kag gindeklarar naman nga patay si Mark Secreto Muller, 38, sang 17-A Quartero St., Jaro, Iloilo City.
Sa interview sang Bombo Radyo kay Nestor Hechanova, isa sa mga nakakita sa insidente, iya ginpahayag nga nagapadulong sa distrito sang Jaro ang duha ka suspek nga nakasakay sa scooter nga motorsiklo.
Suno kay Hechanova, ang lalaki nga may malaba nga buhok amo ang ginatuyo nga patyon sang wala makilala nga suspek samtang nasalabat lang ang isa sa mga biktima.
Ginapahayag nga nagapangihi sa pader sa likod sang emperador building ang biktima sang ginluthang sang isa sa mga suspek.
Sang natumba ang biktima, ginpalapitan pa ini sang suspek agud tiruhon.
Ginabanta 8 tubtub 12 ka lupok ang nabati-an sa lugar.
Nakita sa crime scene ang mga basiyo sang bala nga nagasanto sa caliber 9MM.
