ILOILO CITY – Illegal drugs ang isa sa mga ginasundan nga motibo sa pagluthang-patay sa isa ka call center agent sa Brgy. Taft North, Mandurriao, Iloilo City.
Nahibalu-an nga ginbawi-an sang kabuhi si Mark Muller, 38, sang 17-A Quartero St., Jaro, Iloilo City samtang nasalabat naman ang isa pa gid ka call center nga si Christopher Jinon, 32, sang Brgy. Bularan, Banate, Iloilo.
Santo sa impormasyon, anay drug surrenderee si Muller nga nagsungka sa Oplan Tokhang sang 2017.
Magluwas sa illegal drugs, isa man sa ginasundan nga anggulo amo ang pag-angkon sang madamu nga live-in partner sang biktima sadto.
Blangko sa gihapon ang otoridad tuhoy sa identity sang riding in tandem suspects.
Samtang, nagapati naman ang pamilya Jinon nga naulamid lamang ang biktima nga si Christopher nga nagapabilin sa gihapon sa hospital.
Sa interview sang Bombo Radyo kay Edmond Jinon, amay ni Christopher, iya ginpahayag nga indi magkilalahay ang iya bata kag ang napatay nga si Muller.
Mahimo suno kay Jinon nga natabu-an lang nga yara sa lugar si Christopher sang ginpatay si Muller.
Sa subong suno sa natungdan, yara na sa estable nga kondisyon si Christopher.
