ILOILO CITY – Tuman ang pagpasalamat sang isa ka iloy sa Bombo Radyo bangud nahatagan na sang artificial eye ang iya anak.
Sa interview sang Bombo Radyo kay Rhea Devil sang Sapao, Dumangas, Iloilo, iya ginpahayag nga tuman ka dako ang bulig nga nahatag sa iya sang Bombo Radyo bangud nahatagan sang kahigayunan nga magka-angkon sang artifical eye ang iya bata nga nabulag matapos natuslok sang silhig ang iya mata.
Sang nabatian niya suno kay Devil ang tuhoy sa libre nga konsultasyon sa ginhiwat nga Bombo Medico 2019, wala siya nagpang duha-duha nga nagpalapit sa Bombo Radyo.
Ginpasalamatan man niya si Dr. Rogelio Florete nga chairman sang Florete Group of Companies bangud sa dako nga bulig pinaagi sa Bombo Medico.
Nagpasalamat man siya kay Dr. Jerry Cejar, isa sa mga doktor nga partner sang Bombo Radyo.
Samtang, ginpahayag ni Dr. Jerry Cejar nga ang artificial eye ang makahatag sang proteksyon sa mata.
Dako man ang mabulig sini suno kay Cejar sa psychological nga aspeto sang bata bangud indi na ini mahuya kag indi na pagsunlugon pa sang kapareho niya nga bata.
Ginpahayag ni Cejar nga indi na mabalik sa kinaandan ang mata nga natuslok sang silhig.
Nagpahayag man ang iya mga kaupdanan suno kay Cejar nga kun indi makuha ang na-damage nga mata, mahimo maglapta ang impeksyon sa isa pa ka mata sang pasyente.
Tagsa ka tatlo ka tuig, kinahanglan nga magpakonsulta ang anak niDevil agud ipa check-up ang iya artificial eye.
