ILOILO– Couple goals para sa mag-asawa nga manunudlo sa Fort San Pedro National High School ang pagkalakip sa semi finalists sang Bombo Music Festival 2020.
Sa interview sang Bombo Radyo kay Martin Catequista, composer sang ambahanon nga “Lipad”, iya ginpahayag nga nangin bonding na nila nga mag-asawa ang pagbalay sang mga ambahanon kag nangin kabahin na ini sang ila nga kabuhi.
Magluwas kay Martin, nalakip man sa semi finalists ang ambahanon sang iya nga tiayon nga si Lindsay Catequista nga amo ang nagbalay sang ambahanon nga “Break” nga nagasentro naman sa pagkahilig sang mga kabataan sa subong nga henerasyon sa gadgets nga nakaapekto sa ila pagtuon.
Suno kay Martin, nagasentro sa pagkapositibo nga panan-aw ang mensahe sang “Lipad”.
Nagserbe nga inspirasyon sa iya nga ambahanon suno kay Martin ang iya mga gin-agyan sa kabuhi.
Ginpahayag ni Martin nga ang iya nga ginikanan nga lunsay may huyog sa musika ang rason kun nga-a nangin mahuyugon man siya sa pagbalay sang mga ambahanon.
Tuman naman ang kalipay ni Martin matapos nga nalakip sa sila nga mag-asawa sa semi finalists bangud nga ini ang una nga beses nila nga nagpasakop sa Bombo Music Festival.
Nagalaum man ang natungdan nga makasulod sila nga mag-asawa sa finalists sang Bombo Music Festival 2020.
