ALIMODIAN, ILOILO – Nagakaagnas na sang nasapwan ang 21 anyos nga lalaki samtang nakagapos ang kamot sa sulod sang isa ka bubon sa Sitio Bongol, Brgy. Poblacion, Alimodian, Iloilo.
Ang biktima ang ginkilala nga si Ronilo Alegrado, 21, sang nasambit nga lugar.
Sa interview sang Bombo Radyo kay Delina Alegrado, iloy sang biktima, iya ginpahayag nga sang Sabado pa sang hapon nadula ang iya anak.
Sang amo nga tion suno kay Delina, bag-o lang siya nakatapos sa pagpanglaba samtang yara naman sa ila balay si Ronilo.
Ginpahayag ni Delina nga iya pa nga gin-agda nga magkaon ang iya anak.
Sa pagkamatuod suno sa iloy, naka-agi man sadto nga nga nangin dulaan sa sulod sang pila ka adlaw si Ronilo nga may yara sang nervous breakdown.
Sang Sabado sang hapon, ginpahayag ni Delina nga iya ginpadulungan ang balay sang iya bayaw nga malapit man lang sa ila balay apang wala ang presenysa sang iya anak.
Samtang, nagapati naman ang amay nga si Roel Alegrado nga mahimo nga nagpanginmatay ang iya anak.
Suno kay Roel, sang nasapwan sang isa pa niya ka anak ang bangkay, yara na sa ibabaw ang tiil sang biktima.
Ginpahayag sang amay nga posible nga nagmato-mato si Ronilo sa paghigot sang iya kamot antes naglumpat sa bubon.
Bag-o pa man nasapwan ang bangkay sang biktima, makapila pa sila ka beses suno sa amay nga nagpanglaba kag nagsag-ob sa bubon apang wala sila sang may nakita nga bangkay ukon nakapanimaho nga may yara sang patay.
