ILOILO – Nagakaagnas na ang bangkay sang isa ka lalaki sang nasapwan nga naga pautaw-utaw sa kalalawran nga sakop sang Masbate.
Sa interview sang Bombo Radyo kay Police Staff Sergeant Christopher Balaan, imbestigador sang Carles Municipal Police Station, iya ginpahayag nga ang mga manugpangisda nga nakakita sa bangkay ang tumandok sang Carles, Iloilo.
Suno kay Balaan, wala pa sa gihapon nakilala ang biktima nga nakasuksuk sang duag asul nga sando.
Ginpahayag ni Balaan nga wala sang bisan ano nga identifying marks ukon identification cards ang biktima.
Samtang, sa Brgy. Alaguisoc, Jordan, Guimaras, isa ka bangkay sang lalaki ang nasapwan nga nakasulod sa sako.
Ginkumpirma sa Bombo Radyo ni Police Major Rey Teñala, hepe sang Jordan Municipal Police Station, nga wala pa sa gihapon sang identity ang nasambit nga lalaki.
Ginpahayag ni Teñala nga padayon pa ang imbestigasyon tuhoy sa kamatayon sang biktima.
