ILOILO CITY – Ginsaysay sang isa sa mga biktima kun paano na-snatch sang duha ka mga suspek ang iya cellphone.
Ini matapos nga nadakpan na sang otoridad ang duha ka snatcher nga sanday Jomarie Duran, 18, kag Mar Louie Sensoro, 23, lunsay sang sang Sitio Lunok, Brgy. Cubay, Jaro, Iloilo City.
Sa interview sang Bombo Radyo kay Wency Talaman, sang Agosto 20 samtang nagahulat siya sang tricycle agud kun tani magpadulong sa trabaho, hinali lang nga gin-agaw nanday Sinsoro kag Duran ang iya ginagamit nga cellphone.
Ginkakibot naman ni Talaman ang insidente bangud madasig man nga nagpalagyo ang duha.
Gilayun naman siya nga nagpablotter sa La Paz Police Station kag sang sini lang, may nagpahibalo sa iya tuhoy sa baligyaanay sang cellphone kag nakumpirma nga ang iya mismo cellphone ang ginbaligya sang duha ka suspek.
Nagpanugyan naman si Talaman sa mga nagalakat sa dalan nga likawan ang paggamit sang cellphone agud indi mabiktima sang mga kawatan.
Ginpanginwala naman sang iloy nga nagapanghold- up ang iya anak nga si Jomarie Duran.
Sa interview sang Bombo Rady kay Maria Shiela Duran, iya ginpahayag nga wala nagapangawat ukon nagahimo sang katuntuhan ang iya anak.
Suno sa iloy, wala man nagabarkada ang iya anak kag gilayon man nga nagapuli matapos ang night class.
