BACOLOD CITY – Wala pa sa gihapon sang may nagpangisog nga witness sa pagluthang-patay sa self-confesed bagman sang Beria Drug Group sa Bacolod City sang damlag lang.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga nagapabilin sa gihapon nga persons of interest ang duha ka mga pilason nga lalaki nga nakita nga malapit sa crime scene.
Suno kay Malong, wala sang may makapamatuod nga ang duha ka mga lalaki amo ang nagpangamot sa pagpatay kay Ricky Serenio samtang sakay sa iya awto sa Brgy. Pahanocoy, Bacolod City.
Ginpahayag ni Malong nga magluwas sa kakulang sang witness, wala man sila sang may nakuha nga kopya sang Closed Circuit Television footage nga makapakita sang matuod nga natabo.
Ang gina-uyatan lang sang Police Regional Office 6 suno kay Malong amo ang notebook kag ang bankbook nga nakuha sa sulod sang salakyan ni Serenio.
Nakasaad sa notebook suno sa natungdan amo ang mga pangalan sang ginapahayag sulukton kag natalana nga baligyaan ni Serenio sang illegal drugs.
Sang adlaw nga natabo ang krimen, ginpahayag ni Malong nga natabu-an nga may yara sang mga pulis nga nakabati sang paglinupok kag gilayon nga ginpadulungan ang crime scene.
Nakita pa sang mga pulis nga may nagdinalagan palayo rason nga ila nga ginpaulanan sang luthang ang lugar.
Gilayon man nila nga gintawgan ang Special Weapons and Tactics agud nga i-clear ang crime scene tubtub nga nakita ang duha ka mga lalaki nga pilason nga yara sa kahilamunan.
Bangud sini, gindala sa hospital ang duha ka mga lalaki nga nakilala nga sanday Joemar Dumip-ig, 30, sang Brgy. 14, Bacolod City kag Allan Bustamante, 30, sang Brgy. Mabuhay 2, Toboso, Negros Occidental.
Sanday Dumip-ig kag Bustamante ang ipaidalom sa paraffin test agud mahibalu-an kun may yara sila sang kahilabtanan sa krimen.
