ILOILO CITY – Ginpa-blotter sang 16 anyos nga dalagita sa La Paz Police Station ang 21 anyos nga nobyo bangud sa masami nga pagpanakit.
Ang tagreklamo amo si alyas Nene samtang ang ginareklamo naman amo si alyas JR.
Sa interview sang Bombo Radyo kay alyas TJ, abyan sang biktima, iya ginpahayag nga masobra pa lang sa isa ka tuig nga nangin magkahagugma sanday Nene kag JR.
Suno kay TJ, masami nga ginasakit ni JR si Nene bangud sa pagpangimon.
Ginpahayag ni TJ nga kun maakig si JR, iya nga ginasuluk-sulok kag ginawahig si Nene.
Sa pagkamatuod suno sa natungdan, naka-agi man sadto nga ginpa-blotter si JR sang ginikanan ni Nene bangud nga nagpadulong sila nga duha sa Guimaras nga wala naglisensya.
