GUIMARAS- Nagahulat sa gihapon sang sabat ang probinsiya sang Guimaras sa resolusyon nga ginpadala sang League of Municipalities of the Philippines- Guimaras Chapter sa Department of Transportation.
Katuyuan sang nasambit nga resolusyon nga mapalabat-ot sa natungdan nga ahensya ang ginabakho sang mga pumuluyo sang probinsiya kasunod sang Iloilo Strait Tragedy.
Sa interview sang Bombo Radyo kay Mayor Eugene Reyes sang Buenavista, Guimaras, iya ginpahayag nga kaangay nga nagaantos ang mga pumuluyo sang isla bangud sa mga guidelines sa pagbyahe sang mga pumpboats nga suno sa opisyal, indi paborable sa mga pasahero.
Halimbawa suno kay Reyes amo nga kinahanglan lukuton ang mga overhead tarpaulins/canvass nga makahatag kuntani proteksyon gikan sa init kag ulan.
Gintumod man ni Reyes ang guideline nga pahanugutan lang ang operasyon sang motorbanca kun maayo ang tiempo sa diin ang hangin ang dapat yara sa 7-10 knots ukon Force 3 sa beaufort scale.
Suno kay Reyes, tuman ka nubo ang 10 knots kag kuntani i-adjust ini.
Nagalaum naman si Reyes nga makabaton na sila sang sabat kag pamatian sang Department of Transportation ang ila ginapangayo.
