MIAG-AO, ILOILO – Posible nga magpangatubang sang kaso nga reckless imprudence resulting to homicide ang driver sang Ceres Bus kag Public Utility Jeepney nga nakabunggo-patay sa duha ka sakay sang motorsiklo sa Brgy. Poblacion, Miag-ao, Iloilo.
Nahibalu-an nga patay ang duha ka mga biktima nga sanday John Candelon, 19, sang Brgy. Mat-y, Miag-ao, Iloilo kag Jude Ibot, 23, sang Brgy. Igpuro, Miag-ao, Iloilo.
Sa interview sang Bombo Radyo kay Police Captain Hermogenes Eulatic, hepe sang Miag-ao Municipal Police Station, iya ginpahayag nga naghalin sa Antique kag nagapadulong sa syudad sang Iloilo ang Ceres Bus nga ginamaneho ni Julie Credo, 28, sang Culasi, Antique sang nasumalang kag nakabunggo ang motorsiklo nga ginasakyan sang mga biktima.
Suno kay Eulatic, sang natumba ang mga biktima sa dalan, nalasakan pa gid sila sang nagasunod nga jeep nga ginamaneho ni Ariel Fundales.
Ginpahayag ni Eulatic nga ang isa sa mga biktima ang nakaangkon sang bali sa tiil kag wasak ang ulo samtang utod naman ang tiil sang isa ka biktima.
Sa subong, ila pa nga gina-usisa suno kay Eulatic ang kuha sang dash cam sang Ceres Bus agud nga mahibalu-an kun ano gid ang matuod nga natabo.
