ILOILO CITY – Naglab-ot sa 13 ka sachet sang suspected shabu ang nakuha sa isa ka durugista nga nadakpan sa buy bust operation sa JM Basa St., Iloilo City.
Ang subject sang buy bust operation amo si Narciso Rogan Jr., 43, sang Brgy. Cochero, Molo, Iloilo City.
Si Rogan ang nabaklan sang isa ka sachet sang suspected shabu kag nakuhaan pa gid sang dugang nga 12 ka sachet.
Magluwas diri, nakuha man kay Rogan ang P6,000 nga buy bust money.
Ang buy bust operation ang ginpatigayon sang Regional Drug Enforcement Unit.
Nakita man sa dala nga pouch ni Narciso ang passport kag isa ka cellphone.
Sa interview sang Bombo Radyo kay Rogan, iya ginpahayag nga isa lang ka sachet sang suspected shabu ang nabakal sa iya kag 3 pa gid ka sachet ang iya dala.
Suno kay Narciso, ang iban sa recoveries ang gindugang na lang sang operatiba sang Regional Drug Enforcement Unit.
Sang ginpamangkot kun sa diin siya nagakuha sang supply sang illegal drugs, “no comment” lang ang sabat sang durugista.
May kaangtanan diri, gilayon naman nga nadakpan sa buy bust operation ang ginatudlo nga supplier ni Narciso Rogan Jr. nga si Bryan Kandy Pabulayan, 27, sang Brgy. Benedicto, Jaro, Iloilo City.
Nakuha kay Pabulayan ang 6 ka sachet sang suspected shabu kag P300 nga buy bust money.
Limitado lamang ang ginabuy-an nga pahayag ni Pabulayan nga ginapahayag isa ka pintor.
Ang buy bust operation ang ginpatigayon sa Brgy. Simon-Ledesma, Jaro, Iloilo City kag ginpangunahan sang Regional Drug Enforcement Unit kag Jaro PNP.
