ILOILO CITY – Gasgas sa lawas ang naangkon sang mag-asawa matapos nakabunggo ang ginasakyan nga motorsiklo sa close van sa Brgy. Loboc, La Paz, Iloilo City.
Ang mag-asawa ang ginkilala nga sanday Jose Acollador Pedroso kag Mary Hope Pedroso sang Brgy. Baac, Dueñas, Iloilo.
Sa interview sang Bombo Radyo kay Police Senior Master Sergeant Dennis Yee, imbestigador sang La Paz Police Station, iya ginpahayag nga halin sa Brgy. San Lorenzo ang mag-asawa sa diin ang close van ang naga-parking sa pihak nga lane.
Suno kay Yee, naka-dim light ang suga sang motorsiklo rason nga wala makita sang mag-asawa ang nagaparking nga close van.
Ginpahayag ni Yee nga diutayan lang nga nagsuhot sa idalom sang close van ang motorsiklo apang sa maayo nga palad, wala naka-angkon sang patal nga pilas ang mga biktima.
