SAN JOSE, ANTIQUE – Pagpangimon ang ginalantaw nga motibo sa natabo nga shootout sa Brgy. Atabay, San Jose, Antique sa diin duha ang patay kag apat ang pilason lakip na ang suspek.
Nahibalu-an nga patay sanday Ervin James Checa, manager sang computer shop kag si Ana Anacleto nga amo ang kabulig sa balay sang tag-iya nga si Bayani Rivera samtang pilason naman sanday Police Staff Sgt. Cyril Valdevieso, Police Staff Sgt. Albert Talidong, lunsay na-assign sa San Jose Municipal Police Station, Stephen Checa, correspondent sang isa ka local newspaper kag ang suspek nga si Venom Dio Mangilaya.
Sa exclusive interview sang Bombo Radyo kay alyas Boy, witness sa insidente, iya ginpahayag nga duha sila sang iya abyan ang nagahampang sa computer shop sang nag-abot si Mangilaya.
Suno kay alyas Boy, wala lang niya mabati-an kun ano ang specific nga ginbaisan ni Mangilaya kag ni Checa apang kasubong nga nagapangimon ang suspek bangud nga yara man si Anacleto sa computer shop.
Ginpahayag ni alyas Boy nga sang iya nabalikdan, nakita na niya nga may gina-uyatan na nga armas si Mangilaya kag ginatayaan sanday Checa kag Anacleto.
Naghapa pa si Anacleto samtang gilayon naman nga nagpanawag si Checa sa iya utod nga si Stephen Checa.
Si Stephen suno kay alyas Boy ang nagpanawag sa San Jose PNP kag sang nag-abot sa lugar ang mga pulis, nabati-an na lang nila ang asud-asud nga lupok.
Bangud sa kakulba, ginpahayag sang natungdan nga mansig palipod na lang sila agud nga indi masalabat bangud nga nagpalagyo pa ang suspek matapos ang pagluthang sa mga biktima.
