NUEVA VALENCIA, GUIMARAS – Utod ang tiil kag kamot sang isa ka lalaki nga ginapahayag naghikog paagi sa pagpalupok sang dinamita sa Sitio Pag-asa, Brgy. Cabalagnan, Nueva Valencia, Guimaras.
Ang biktima ang ginkilala nga si Jury Gonzaga, 48, sang nasambit nga lugar.
Sa interview sang Bombo Radyo kay Edmer Entredicho, pakaisa sang biktima, iya ginpahayag nga stroke survivor ang Gonzaga kag pagpanagat lang ang iya palangabuhi-an.
Suno kay Entredicho, naga-isahanon lang sa balay ang biktima rason nga wala niya mahibalu-an kun ano gid ang motibo sa paghikog sang iya pakaisa.
Ginpahayag ni Entredicho nga nagahigda siya kamalig sang hinali lang niya nabati-an ang tuman ka matunog nga lupok.
Sang iya nga ginlantaw, nakita niya ang puti nga aso sa palibot kag ulihi na lang nga nakita ang nagahuray-ad ang bangkay sang biktima.
Nagapadayon pa ang imbestigasyon sang otoridad sa insidente apang nagapati naman ang natungdan nga naghikog ang biktima.
