ILOILO CITY – Patay ang 17 anyos nga solterito matapos naghikog sa ila balay sa La Paz, Iloilo City.
Ang biktima amo si Nico sang Brgy. Divinagracia, La Paz, Iloilo City.
Sa interview sang Bombo Radyo kay Police Chief Master Sgt. Jerwin Servano, Chief Investigator sang Lapaz Police Station, iya ginpahayag nga nag-angkon sang indi pag-intindihanay ang biktima kag ang nobya nga si Nene.
Suno kay Servano ang away ang nag-ugat matapos nga nakit-an sang pamilya sang nobya nga nagapanigarilyo ang biktima.
Nasapwan na lang sang iya mga utod nga nagabitay ang biktima sa guwa sang ila balay gamit sang nylon cord.
Gindala pa sa hospital ang biktima apang gindeklarar sang doktor nga dead on arrival.
