Nakuhaan sang isa ka daku nga sachet sang suspected dried marijuana leaves ang duha ka ginapahayag estudyante paagi sa buy bust operation nga ginpatigayon sa Gen. Luna St., Iloilo City.
Ang subject sang buy bust operation amo si Hanz Christian Seguia, legal ang edad samtang nadakpan man ang nagaserbe nga middle man nga wala na ginhingadlan.
Sa interview sang Bombo Radyo sa team leader sang Drug Enforcement Team sang Police Station 1, iya ginpahayag nga ginapaagi ni Seguia sa social media ang transaksyon.
Ginpahayag sang natungdan nga si Seguia ang nagaserbe nga supplier apang indi pa mapat-od kun diin nagahalin ang supply.
Magluwas sa marijuana, nakuha man kay Seguia ang P1,100 nga buy bust money kag isa ka pouch.
Magapangatubang sang nagakaigo nga kaso ang duha ka drug personality.
