ILOILO – Magahatag ang Iloilo Provincial Government sang P3 million bilang cash assistance sa mga biktima sang asud-asud nga linog sa Mindanao.
Ipakigbahin ang P2 million sa North Cotabato, kag magakadto naman sa Davao del Sur ang P1 million.
Sa interview sang Bombo Radyo kay Iloilo Governor Arthur Defensor Jr., iya ginpahayag nga ini ang santu sa kapasidad man sang calamity fund sang probinsya.
Suno kay Defensor, may ara man sang pagsinapol ang iban nga Local Government Unit (LGU) sang iban nga banwa sa probinsya sa sunod nga semana, kag mas maayo suno sa iya kon i-dungan na lang ang bulig nga mahatag sa Mindanao.
Dugang ni Defensor, bukas man ang ila pamunuan sa pagbaton sang “in cash or in kind” nga bulig nagikan sa mga pribado nga sektor, apang suno sa iya, mas maayo gid kon “in kind” ang pilion nila nga ihatag.
Iya ginpasalig nga ila ipakig-angot ini nga assistance sa Philippine Coast Guard (PCG) ukon sa air force agud makalab-ot sa mga biktima sang linog sa Mindanao.
