ILOILO – Natukiban nga isa ka intel sang New Peoples Army (NPA) ang isa ka anay punong barangay sa banwa sang Maasin matapos nga siya ang ginserbehan sang search warrant sa ila mismo barangay.
Ang subject ang ginkilala sa kay Herman Alleza sang Brgy Bolo, Maasin, Iloilo.
Sa interview sang Bombo Radyo kay Pol. Lt. Col Jay Malong, Commander sang 601st Company sang Regional Mobile Force Batalion, ang “target” sang search warrant amo ang 45 kag 38 nga kalibre sang armas kag granada bangud man sang reklamo sang pila ka mga pumuluyo nga nagapakawal si Alleza, nagamaoy, kag nagapalupok sang armas sa tion nga mahubog.
Dugang ni Malong, ila ginvalidate ang impormasyon kag gilayon nga ginserbehan sang 601st Company sang Regional Mobile Force Batalion kag Maasin Municipal Police Station sng search warrant si Alleza.
Na-recover sa iya nga balay ang isa ka hand grenade, 1 ka rigbelt, ammo holster, handcuff pouch, baton holster, tear gas holster, 1 ka libro sang malip-ot nga kurso sa katilingban kag rebolusyonaryong Pilipino kag isa ka libro man nga CAHRILL.
Nagapabilin nga yara sa kustodiya sang Maasin Municipal Police Station si Alleza kag subong nga adlaw, nakatalana siya nga pasakaan sang nagakaigo nga kaso.
MIEMBRO SANG NPA?
Samtang, ginpahayag sang awtoridad nga ginalegar lider sang propaganda sang mga cause oriented groups si Alleza, sa diin siya ang naga-organisa kag nagatipon sang mga magasunod sa ila grupo.
Siya man ang ginapahayag kabahin sa Lambat Paniktik ukon intel sang Baluy-Platoon sang Central Front sang Komiteng Rehiyon sa Panay.
Dugang pa ni Malong, siya ang isa ka anay miyembro sang NPA apang nagbalik lang sa gobyerno.
Kon madumduman, sang November 2017, gin-ambush sang mga ginapahayag miyembro sang NPA ang mga kapulisan sa Maasin, sa diin si Herman Alleza ang katapusan nga tawo nga nakita sa ambush site.
Padayon man nga gina-verify sang otoridad kon bala isa man siya sa mga myembro sang NPA nga nagsulod sa police station sang Maasin.
MGA LIHOK SANG KAPULISAN.
Kaangot diri, yara sa full alert status ang Police Regional Office 6 (PRO).
Sa interview sang Bombo Radyo kay Pol. Lt. Col Joem Malong, tagpamaba sang amo nga pamunuan, may yara technique ang NPA sa diin may isa ka babayi nga naga pakuno-kuno nga complainant sa mga police stations kag naga-casing na sang istasyon.
Suno kay Malong, may yara sang minimum deployment ang tagsa ka police stations agud nga malikawan nga sudlon sang mga rebelde.
