CONCEPCION, ILOILO – Nagapangatubang sang kaso nga reckless imprudence resulting to homicide and multiple physical injuries ang driver sang tricycle nga nakabunggo-patay sa manunudlo sa Brgy. Agnaga, Concepcion, Iloilo.
Sa interview sang Bombo Radyo kay Police Major Jonah Galicha, hepe sang Concepcion Municipal Police Station, iya ginpahayag nga ang biktima ang ginkilala nga si Tita Pareja, 56, Brgy. Puente Bunglas, Ajuy, Iloilo.
Suno kay Galicha, kaupod ni Pareja ang iya duha ka anak nga sanday Carol, 29, kag Lino, 14, sang natabo ang aksidente.
Ginpahayag ni Galicha nga nagapadulong sa Ajuy, Iloilo ang tricycle nga ginamaneho ni Adonis Bansa, 25, sang Brgy. Tipacla, Ajuy, Iloilo sang nabunggu-an ang mag-iloy sa diin si Carol ang naka-angkon sang pilas sa ulo samtang wala naman sang pilas nga naangkon si Lino.
Depensa sang driver, nasilawan siya sa headlight sang nasumalang nga salakyan rason nga iya ginpabinit ang tricycle kag nabunggu-an ang mga biktima.
Pilason man sa aksidente ang pasahero sang tricycle nga si Rachelle samtang gindala pa sa hospital ang mununudlo apang ginbawi-an sang kabuhi.
Sa subong, preso na sa Concepcion Municipal Police Station ang driver sang tricycle.
