ILOILO CITY – Padayon nga ginabulong sa hospital ang barangay tanod nga biktima sang riding-in-tandem suspects sa Zone 2, San Juan, Molo, Iloilo City.
Ang biktima amo si Lemuel Villaruel alyas Junjun sang nasambit nga lugar.
Sa interview sang Bombo Radyo kay Brgy. Kagawad Fidel Estrevillo, iya ginpahayag nga siya mismo ang nagdala sa biktima sa hospital.
Suno kay Estrevillo, nagahambal pa ang biktima sang gindala sang hospital sa diin ang duha ka suspek ang nagasakay sa motorsiklo kag lunsay may tabon ang nawong.
Ginpahayag ni Estrevillo nga santo sa iya nakita, naka-angkon sang pilas sa tuo nga bahin sang tiyan kag may gasgas sa lawas ang biktima.
Wala nakuhaan sang footage ang pagpangluthang sa biktima bangud nga guba ang Closed Circuit Television sa lugar.
Sa subong, padayon pa nga ginahibalo sang otoridad ang motibo sa krimen sa diin gilayon naman nga nagpalagyo ang duha ka suspek.
Nakuha sa crime scene ang ginabanta pito ka basiyo sang .45 caliber pistol sa diin ginapahayag nga nakabalos pa ang biktima.
