ILOILO CITY – Patay ang drug personality nga down line sang Prevendido drug group matapos nagbato sa buy bust operation sa Lopez Subd., Brgy. Dulonan, Arevalo, Iloilo City.
May duha ka igo sa dughan kag may tatlo ka igo sa likod ang subject sang buy bust operation nga si Bernardo Chavez, legal ang edad kag temporaryo nga nagatinir sa nasambit nga lugar kag ginapahayag tumandok sang Brgy. Cuartero, Jaro, Iloilo City.
Sa interview sang Bombo Radyo kay Robin Madrigira, tag-iya sang boarding house, iya ginpahayag nga sang nagligad lang nga Oktubre 6 nagdayon sa iya balay si Chavez.
Suno kay Madrigira, masami nga wala nagatinir sa boarding house si Chavez nga nagpakilala nga tumandok sang Manila kag isa ka seaman.
Bangud sa iya namutikan, ginpahayag ni Madrigira nga nagduda na siya kay Chavez.
Ginpahayag ni Madrigira nga kun kaisa, may nagabisita kay Chavez sa boarding house kag may dala nga bag.
Antes pa man ang buy bust operation, ginpahayag sang natungdan nga may nagsulod sa ila balay kag nagpakilala nga mga pulis.
Ginpaandaman sila nga maghalin sa lugar agud nga indi maulamid sa tion nga may pagbayluhanay sang lupok nga matabo.
Samtang, ginkumpirma sang Team Leader sang Regional Drug Enforcement Unit nga down line sang Prevendido drug group si Chavez.
Suno sa Team Leader, namutikan ni Chavez nga isa ka buy bust operation ang natabo rason nga naggabot siya sang armas kag gintuyo nga luthangon ang poseur buyer rason nga nagbalos ang operatiba.
Ginpahayag sang Team Leader nga mabudlay dakpon si Chavez bangud masami ini nga nagasaylo-saylo sang ilistaran.
Ginapahayag nga P8,000 ang minimum nga balor sang illegal drugs nga ginabaligya sang nasambit nga drug personality.
Sang gin-usisa ang bangkay ni Chavez, nakuha sa iya ang 16 ka bilog nga P500 sa diin 15 diri ang boodle money kag listahan nga may yara sang pangalan.
